Om Swastyastu semeton Bali sane mangkin titiang jagi ngelanturang conto Dharma Wacana Sane Memurdha UPACARA METATAH, durusang sampun copy! nanging elingan comment nae!
Om Swastiastu,
Inggih ratu idadane sane wangiang titiang, pemekas ring panureksa sane dahat kusumayangtitiang, sareng ring para semeton titiang para sisia SMAN 1 Bangli sane tresnasihin titiang. Ring galahe sane becik puniki titian rumasa garjita ring manah, riantukan presida kacunduk ring ida dane sareng sami. Sane mangkin titian jagi ngaturang Dharma Wacana ngenenin indik“Kasuksman Upacara Matatah”
Ida dane sareng sami, upacara Matatah wantah bacakan saking upacara Manusa Yadnya, inggih punika upacara sane matetujon ngulati karahayuan, lan nincapang kasucian saking para jana sane maurip ring Mayapada puniki. Upacara Matatah kalaksanayang risedek iraga sareng sami sampun menek kelih, utawi magentos saking rare manados yowana.
Upacara Matatah matetujon nyuciang angga sarira miwah pikayunan saking sang inaskara mangda parilaksana kaon/Asuri Sampad mangdane manados parilaksana sane hayu/Daiwi Sampad. Niyasa saking upacara Matatah wantah ngasah utawi ngarataang untu saking sang ingaskara sane madue teges ngasorang ambek keraksasan sane wenten ring angga sarira i manusa.
Ring tutur lan sastra sane dados tatamian saking panglisir iraga sareng sami wenten makudang-kudang lontar sane ngamaosang mitologi saking upacara Matatah puniki, umpaminyane ring Lontar Kala Tattwa kabawosang wenten oka saking Ida Bhatara Siwa sareng Ida Bhatari Uma sane metu saking kama Ida Bhatara Siwa sane ngetel ring tengahing samudra, lan kaurip olih prawatek Nawa Dewata, risampunne urip, kama punika magentos rupa manados Bhatara Kala, rupa idane aeng, lan maduwe caling renggah. Digelis Ida Bhatara Kala lunga ngarereh rerama idane, nanging tan sida kacunduk. Punika ngawinang Ida Bhatara Kala rumasa sungsut ring manah lan ngungsi Swargaloka, ring Swargaloka ida kahadang olih wadwan Nawa Dewata, nanging sami sida kakasorang olih Ida Bhatara Kala, Ida Bhatara Siwa raris tedun, rigelis ida mojar: “ Uduh dewa Bhatara Kala tungudiang dewa nguwugang swarga, yen yukti manah dewane dot matemu lawan ibu bapa dewane getep malu asahang caling dewane pastika sampun dewane matemu lawan ibu bapa dewane.” Manut linging Ida Bhatara Siwa, lantas kagetep caling Ida Bhatara Kalane olih Ida Bhatara Siwa, sedek punika malih Ida Bhatara Siwa mojar : “ Nah.. dewa Bhatara Kala, ne suba sayuwakti ibu bapa dewane ane ada di ajeng idewa, suud dewa marasa sungsut ring manah” .Saking tutur punika, raris iraga sida nyutetang ngasahang untu, utaminyane caling puniki madue teges sumangdane sang ingaskara sida matemu lawan ibu bapannyane, ibu bapa puniki maartos Ida Bhatara Kawitan, wit saking manusa sane wenten ring Mayapada.
Upacara Matatah taler maduwe teges ngicalang mala, lan satru sane wenten ring angga sarira soang-soang sane ketah kebawos Sad Ripu. Ring kakawin Ramayana kabawosang : “Ragadi musuh maparo, ring hati ye tongguania tan madoh ring awak” sane maartos : musuhe punika nampek pisan , wantah ring jeroning hati ten joh saking raga pedidi. Sajeroning upacara Matatah puniki wantah pangaskaran sumangdane Sad Ripu lan parilaksana kaon ring sikian jadma sane kaupakarain manadi suda suci nirmala.
Indik dudonan upacara Matatah sane lumbrah inggih punika :
1. Pakalan-kalan
Pakalan-kalan wantah dudonan upacara sane matetujon ngicen lelaban ring Bhuta Kala mangda tan ngapiambengin yadnya sane jagi kalaksanayang, taler mangda mala sane wenten ring sang matatah sida kailangin. Dudonan upacara niki nganggen upakara Caru Ayam Brumbun utawi Segehan Agung.
2. Pangekeban
Pangekeban maduwe teges ngekeb indriya. Indriya kasekeb mangda ring sajeroning sang matatah ngalaksanayang upacara lan taler nerus ring kauripannyane sida maniosang sane mawasta Subha Karma lan Asubha Karma.Santukan ring Saramuscaya kabawosang :
“apan ikang dadi wwang uttama juga ya, nimittaning mangkana, wenang ya tumulung awaknia sangkeng sangsara makasadhanang subhakarma”. Sane mateges embas menados manusa wantah sane saking uttama, sida nulung awaknyane saking sangsara malarapan antuk Subha Karma
Ring dudonan upacara puniki sang matatah sane maraga rare mangkin sampun magentos dados yowana/remaja. Upacara puniki kalaksanayang ring Bale Pangekeban/Bale Gedong.
3. Ngendag
Ngendag puniki wantah pucak upacara saking upacara Matatah. Sang matatah untunyane karajah olih sang pamuput antuk aksara-aksara modre. Untu punika wenten nemnem minakadi caling kalih, lan gigi seri patpat. Sasampun wusan karajah sang matatah munggah ke Bale sane sampun kasiagaang. Wus punika sang matatah nyawasana, lan ngambil tatanganan amustikarana sasampunnyane sang pamuput utawi sangging sane sampun kasudi raris ngasahang nemnem untune punika, maka pralambang sampun kasornyane sad ripu ring angga sarira sang matatah. Sisan kumur saking sang matatah kawadahin antuk klungah nyuh gading sane sampun kinasturi.
4. Majaya-jaya
Majaya-jaya puniki inggih punika upacara sane matetujon nglungsur waranugraha ring Ida Bhatara-Bhatari sareng sami, utaminyane ring Ida Bhatara Kawitan.
Saking babawosan puniki iraga prasida nguningin kasuksman upacara Matatah inggih punika ngicalang mala, sad ripu sane wenten ring angga sarira mangda manados suda suci nirmala, cihna sang manusa sane sampun yowana, miwah jalaran rasa tresnasih saking rerama ka pianaknyane.
Yening cutetang tiang malih apisan bebaosan ngeninin indik Kasuksman Upacara Matatah puniki inggih punika :
1. Upacara Matatah ngaranjing upacara Manusa Yadnya sane matetujon ngicalang mala, sad ripu, miwah nyuciang angga sarira.
2. Upacara Matatah niki maka cihna sang manusa sampun magentos saking rare manados yowana.
3. Upacara Matatah madue dudonan inggih punika : Pakalan-kalan, Ngekeb, Ngendag, lan Majaya-jaya sane madue teges lan tetujon soang-soang.
Inggih ida dane sareng sami, punika dumun titiang ngaturang Dharma Wacana ring rahina puniki, “Ka Kintamani nuju Batur, rauhring kayang numbas keranjang. Saking nuni titiang maatur-atur, yening wenten iwang ampurayang”. Maka wesananing atur untatin titiang antuk Parama Santih ,
Terimakasih sangat membantu
ReplyDeletesuksma :)
ReplyDelete