PIDARTA RING SEJERONING NYANGGRA RERAINAN SIWARATRI

Contoh Pidato Bahasa Bali

PIDARTA RING SEJERONING NYANGGRA RERAINAN SIWARATRI

Om Swastiastu,

Inggih ida dane sareng sami, utaman ipun Bapak Guru sane dahat kusumayang titiang. Punika taler para semeton sane tresna sihin titiang.

Titiang rumasa bagia pisan, riantukan prasida mesadu ajeng sareng para semeton. Iriki, ring rahina puniki. Rahina sane mapikenoh "Pendalaman lan pengamalan ajaran Sradha lan Bhakti".

Sadurung nyane, ngiring sareng-sareng nyihnayang rasa pangayu bagia majeng ring Ida Sang Hyang Parama Kawi. Sangkaning sih asung kerta wara nugraha Ida, titiang ping kalih ida dane ngamangguhang kerahajengan.

Ida dane sareng sami sane wangiang titiang, manawita ida dane sareng sami sampun uning. Rahina Siwaratri punika rauhnyane a masa apisan, inggih punika rikala nemoning Tilem Kapitu. Kocap rikala punika bebratan utawi ajaran melatih ngulat sarira olih Ida Sang Hyang Parama Kawi, kemargiang sane ngaptiang mangda mewali angga sarira melinggih ring genahe sujati.

Ida dane semeton sareng sami, waluya nasikin segara, titiang purun ngadeg iriki jagi nguningayang suksman rerainan Siwaratri, sane minabang titiang ida dane sami sampun tatas uning. Nanging sangkaning meled manah titiang, titiang matur ngaturang majeng ring ida dane semeton sami.

Ida dane semeton sami sane kusumayang titiang. Titiang nglungsur ledang, riantukan titiang malih jebos nenten ngungkap daging purana-purana utawi kajian-kajian indik kekawin sane memuat Siwaratrikalpa riantukan nis titiang "Jugul Mapunggung" kabaos.

Dadosne pidartan titiang malih jebos, sekadi sesongganne mebatok wayah jeg nongklang-nengkleng. Sakewanten, ida dane sareng sami sampunang sumania riantukan wenten lengkara kunci sane anggen ring kayun pacang kekaturang, maka gegambelan risejeroning iraga dumadi ring jagate inggih punika : papa, lupa, atutur, aturu, himsa, tapa, brata, yoga, lan samadi.

Ida dane sane tresna sihin titiang, yening sami renungan sane aturang titiang ring ajeng kawedar, janten sampun iraga sami prasida ngulat sarira utawi ngeret indria ngangkening ring padewekan soang-soang. MATUTUR IKANG ATMA RUATINYA, artine sang atma sadar ring padewekan. Sakewanten duaning kebande antuk galah pidartan titiang risejeroning rerahinan Siwaratri pacang aturang titiang unteng-unteng kemaon manut bacakan nista, madya, uttama, inggih punika :

a. Prade Uttama kelaksanayang antuk

1. Mona Brata (Berdiam diri dan tidak bicara)
2. Upawasa (Tidak makan dan minum)
3. Jagra (Berjaga, melek, tidak tidur)

b. Prade Madyama (Menengah) kelaksanayang antuk

1. Upawasa
2. Jagra

c. Prade Kanistama (Sederhana) kelaksanayang antuk

1. Jagra kemaon

Inggih ida dane sareng sami, sane kusumayang titiang, manawi asapunika sane prasida aturang titiang majeng ring ida dane sami nganinin indik  Rahina Siwaratri puniki. Manawi ring sejeroning napi sane baosang titiang i wawu wenten iwang antuk titiang matur, titiang nunas pengampura.

Sadurung sineb titiang, titiang pacang ngaturang gegonjakan

Saking Kintamani nuju Batur
Rauh ring Kayang numbas keranjang
Saking nuni titiang meatur-atur
Yening wenten iwang ampurayang

Suksma

Om Santih, Santih, Santih, Santih Om